MENU LOG IN CART {{currentCart.getItemCount()}}

店主的話

[ 我在Tent一Tent走過的日子 ]

2019年4月20日係Tent一Tent 成立4週年。呢4年入面,由一開始冇人認識我地到而家有自己既門市,條路實在唔容易。開業果時的確好難捱。當時店主仲未夠20歲,讀緊Degree、返緊Part-time。所有洗費自己搵錢自己俾,辛辛苦苦儲到舊錢就膽粗粗拎左出黎買營具,整左個FB Page,就當係做緊生意。一開始的確係冇乜人會租露營用品。聽得最多既係「傻既咩,邊有人會租你D野?」冇錯,一開始的確係冇。營具擺左係度半年,都冇人問過。當時心態係:唔緊要啦,D營具買完擺左係度又唔會壞,咪繼續擺落去。到真係有人問既時候,咪當賺左。等左半年,Tent一Tent終於有第一位客人幫襯。係開心既,因為第一位客人既出現,第二、第三、第四位客人亦開始陸續出現。同時間,店主終於畢業,以一個fresh grad身份出黎搵左份文員仔做,正式開始打兩份工既日子。

一開始的確係好辛苦,日頭9點返到公司一直做野OT加班到7-8點先走得。收工之後再趕返倉執裝備、拎出街同人交收營具。交收完再係倉度清潔、打理、做文件、覆FB MSG。基本上每日凌晨1點先返到屋企沖涼訓教休息、係仲有食晚飯。第二日如是繼續返工。

一路過黎,一直有好多客人支持Tent一Tent,同朋友推介Tent一Tent,令Tent一Tent一直發展到今時今日。係2018年7月,店主決定放棄手上既職業。全心全力投入Tent一Tent工作。同年9月,觀塘門市正式開張同大家見面。到2019年2月26日集齊1000個like,實在得黎不易。

有人話:你開左咁耐都係得果幾百個like、黎黎去去都係果幾十張單。不如你唔好做執鬼左佢啦。處理又麻煩,搵埋搵埋又賺唔到錢。做乜仲要做落去?

冇錯,佢地全部都講得好岩,店主的確係唔識做生意。全部搵錢野店主都冇做過咁制。行山露營團店主又唔帶,廣告店主又唔係點做,貨店主又入得少,邊有人咁樣做生意。

店主冇出聲,只係一直默默咁去做,因為店主冇忘記到,當初點解會開始Tent一Tent,開始做租用營具。

「降低露營入場門檻、避免買錯裝備而提供試用機會、引導客人尋找適合自己既裝備、完善裝備挑戰戶外活動、最後分享戶外活動既樂趣。」係Tent一Tent既目標。

憑住以上呢幾點,Tent一Tent一直有唔少改進。由當初只有平價貨租,到中期開始有歐美品牌租用。到而家除左租用,試岩仲可以搵我地訂購,開埋買賣商店、提供露營用品等服務。

而客人由最初問套裝包D咩、幾錢、唔係好知露營究竟係D乜。到而家會問: 有D咩分別、邊款會好D、仲有D咩要加、點樣會岩自己多D。到最後選擇到岩自己心水既營具而減少買錯營具所做成既浪費。同時都懢返唔少錢。

係未來Tent一Tent會舉辦山藝訓練、緣繩下降、海外攀登等訓練課程及活動。令大家可以更有效、更安全及更加開心去咁探索大自然。學習更多知識,去爬更高既山。

最後,店主希望各位可以繼續支持Tent一Tent。因為有你地既支持及鼓勵,令店主更有動力推動Tent一Tent,令Tent一Tent再創高峰。