係呢度我地會同大家分享一下有關露營既小資訊、店舖遇到既小故事等等。

  左邊兩幅圖係2015年岩岩開始既第一個套裝。你會發現，呢個套裝既特色係只有營、爐頭同埋cook set。 點解剩係得呢三樣既呢? 因為當時既起動資金只係夠買呢幾樣野。咁其他野點算好? 唯有慢慢打工儲下錢再買。

  岩岩開始做生意，理想當然係諗到好好。嘩，呢鑊掂啦，實有好多人會過黎租野啦。但係大家都知道，現實永遠係殘酷既。好記得當時呢幅圖整左出黎，擺左係度幾個月都冇聲氣。心諗都係腳踏實地返工搵錢算，有人問先再算。 

  我好記得大約擺左半年左右，大約11月既時候啦。開始有人過黎問，你地係咪有營租嫁? 亦都好好彩咁成功做左第一單生意。當時既心情就好似星爺成功賣出第一碗瀨尿牛丸咁。咁咪踏出成功既第一步囉。

  之後因為呢半年期間都仲不斷咁返工搵錢，所以去到年尾終於有多小小錢可以幫間公司買多小小裝備。可以成功砌到套完整既套裝。跟住就到下一階段既套裝啦。 

(P.S. 因為係第一位客人，所以到而家印象都仲好深刻。好記得當時11月既時候天氣仲係好熱，去左葵芳XXR交收。客人當時因為女朋友生日，女朋友想過一個比較特別D既生日，最後選擇左去露營。咁岩又遇見到我地，咁就做左第一單啦。如果你有機會見到呢篇文，想係度多謝返你當年既支持。因為如果當年冇你既第一單，我地都唔會走得到今時今日，多謝你。)